Ambasadori i Japonisë vizitë në Bashkinë Krujës, mbi forcimin e mëtejshëm mes dy institucioneve.

Ambasadori i Japonisë, SH.T.Z TAKADA Mitsuyuki vizitoi qytetin e Krujës ku zhvilloi edhe një takim kortezie me Kryetarin e Bashkisë Krujë, Z. Artur Bushi. Në kuadër të skemës “Grante për Projekte të Sigurisë Njerëzore në Nivel Lokal”, Bashkia Krujë ka përfituar dy grante, një për blerjen e një zjarrëfikëse të re dhe një për blerjen e një fadrome. Të dyja projekte rrisin sigurinë publike për banorët në situata emergjente si zjarre, aksidente, përmbytje apo mirëmbajtje të rrugëve rurale.

Nëpërmjet këtij projekti, sherbimit të MZSH-së të Bashkisë Krujë iu dhurua një automjet zjarrfikës me pompë dhe depozitë uji. Gjatë ceremonisë, Z. Bushi, Kryetari i Bashkisë, i shprehu mirënjohjen e tij Qeverisë së Japonisë. “Pata kënaqësinë të mirëprisja ambasadorin e ri të Japonisë, Sh.T.Z Takada dhe ta falenderoja nga afër për ndihmën e vyer për blerjen e një zjarrëfikëse të re. Po ashtu, në emër të komunitetit i shpreha mirënjohjen edhe për ndihmën e çmuar për spitalin e Krujës, në të cilin tashmë ka një ambulancë të re e që gjatë kohës së Covid-19 plotësoi një nevojë të madhe të shërbimit të urgjencës” –theksoi ndër të tjera Kryebashkiaku.

Gjatë takimit u diskutuar edhe për projektet në vijim, sidomos në shkëmbime kulturore dhe ato turistike.

Rindërtimi/ Vijon proçesi i demolimit të pallateve të pabanueshme nga tërmeti i Nëntorit 2019!

Në Krujë vijon proçesi i rindërtimit e shtëpive të reja për familjet që humbën shtëpitë nga tërmeti i 26 Nëntorit. Plot 39 pallate do të shemben në Bashkinë Krujë e nga këto 23 janë në qytetin e Krujës. Menjëherë pas prishjes së pallateve, nis faza tjetër ajo e ndërtimit të infrastrukturës nëntokësore dhe truallit për zonën e re të rindërtimit. Bashkia Krujë është një nga bashkitë më të prekura nga tërmeti dhe është e vetmja bashki me 4 zona të reja rindërtimit. Një nga këto është në Krujë, e cila do të jetë e ndarë në Zonën A në rrugën Gavril Dara, ose Ballëm Efendiu dhe tjetra në rrugën Karl Gega, ose siç njihet ndryshe lagja nr 4.

Gjithashtu në qytetin e Krujës do të demolohen edhe 5 pallate të cilat do të shpronësohen për interes publik. Në qytetin e Krujës janë 684 banesa të cilat do të ndërtohen, nga këta 242 apartamente brenda zonave të rindërtimit dhe 96 apartamente në zonat jashtë sitit të rindërtimit. 96 apartamentet që janë jashtë sitit kanë të bëjnë me rindërtimin e pallateve në vendin ku aktualisht janë të pozicionuar pallatet e vjetra. Në dy zonat e siteve janë 14 pallate që do të ndërtohen dhe 7 pallate janë jashtë siteve. Ndërkohë, 346 shtëpi janë individuale të cilat do të ndërtohen në vendin ku aktualisht e kanë banesën.